Pletheking Surya
Kaanggit dening : Adri Wahyono
Tabuh papat binarung swara jago kluruk
Hawa isih krasa adhem trumecep ing wayah esuk
Ing wektu iku lagi kepenak turu
Nanging bapak meksa aku enggal wungu
“Yen, kowe abot karo turumu, selawase kowe ora bakal meruhi kayangapa endahe pletheking surya iku!”
Abot banget rasane, iki aku isih kepengin turu
Sakdawane lumaku aku isih ngeman ngantukku
Swarane bapak sing kepengin gawe gumregahku mung lamat-lamat keprungu
Saiki lakuku lan bapakku wis wiwit munggah gumuk
Nanging pikiranku isih keri ana sajrone ngantuk
Iba rasane nalika tekan pucuking gumuk
Sanalika ilang rasa ngantuk lan hawa nruthuk
Langit ing sisih wetan ora bisa kagambarake kaendahane
Pletheking surya sing dikandhakake bapakku nyata endah saknyatane
Bola-bali netra tak kedhepake
Pranyata wayah pletheking surya iku langit wetan katon endah ngresepake
Bapak mesem
Aku, uga mesem
